SFO lömuð eftir rannsókn á Kaupþingsmáli

Efnahagsbrotadeild bresku lögreglunnar, eða Serious Fraud Office, gerði ekki eina einustu húsleit á tímabilinu apríl 2011 - apríl 2012. Breska blaðið Financial Times fjallar um málið á vef sínum í gær og telur vísbendingar vera um að stofnunin sé orðin of varkár eftir að Tchenguizmálið klúðraðist.

Húsleitir hjá bræðrunum Vincent og Robert Tchenguiz í mars 2011 vöktu mikla athygli, en að undanförnu hefur verið deilt um það hvort heimild hafi verið fyrir húsleitum og handtöku bræðranna. Sú deila er nú komin fyrir dómstóla.

Á tímabilinu apríl 2008-apríl 2009 réðst Serious Fraud Office í 63 húsleitir. Árið eftir var ráðist í farið í 43 húsleitir og þar eftir var farið í 47. Financial Times segir að þessar tölur hafi vakið upp spurningar um það hvort stofnunin sé starfhæf.

„Ef fyrirtæki og einstaklingar liggja undir grun um fjárhagssvindl er nauðsynlegt að eftirlitskerfið virki," sagði Barry Vitou, meðeigandi hjá Pinsent Masons, sem vann að úttekt á störfum SFO. Hann segir að þótt SFO sæti núna gagnrýni vegna Tchenguizmálsins sé nauðsynlegt að það skjóti sér ekki undan mikilvægum málum.

Sem kunnugt er voru Tchenguizbræðurnir hluthafar í Kaupþingi og stærstu skuldarar bankans. Rannsókn SFO á máli þeirra lýtur að viðskiptum þeirra við bankann.