Umfjöllun og viðtöl: Þór/KA vann uppgjör toppliðanna

Þór/KA fór með sigur af hólmi í uppgjöri toppliðanna í Pepsi deild kvenna á Akureyri í kvöld. Akureyringarnir unnu 2-0 gegn þróttlausum Blikastúlkum.

Fyrri hálfleikur var fjörugur. Bæði lið fengu fín færi og á meðan Chantel Nicole Jones var með allt á hreinu í marki Þórs/KA, skoruðu Norðanstúlkur tvö góð mörk. Jones er gríðarlega öflug en vörn Þórs/KA, með Gígju Harðardóttur fremsta í flokki , hélt vel aftur af Rakel Hönnudóttur, fyrrum fyrirliða Þórs/KA, og félögum hennar. Fanndís Friðriksdóttir var á bekknum allan tímann, lítillega meidd.

Fyrra markið kom eftir vandræða Blika með stífa norðanáttina. Þór/KA vann boltann eftir útspark og Katrín Ásbjörnsdóttir komst ein í gegn og kláraði færið einkar vel. Heimamenn tvöfölduðu svo forystuna þegar Katrín átti stungusendingu á Söndru Maríu Jessen sem fór framhjá Birnu Kristjánsdóttur í markinu og setti boltann í netið.

Þórsarar pressuðu Blika vel og gestirnir misstu boltann nokkrum sinnum, meðal annars í fyrra markinu. Blikastúlkur komu boltanum reyndar einu sinni í markið, en þá var dæmd rangstaða, réttilega.

Blikar tóku sig á í seinni hálfleik og Rakel Hönnudóttir átti tvö góð skot rétt framjá á fyrstu mínútunum.

Þórhildur Ólafsdóttir fékk gott færi fyrir Þór/KA en Sandra María fékk svo algjört dauðafæri til að klára leikinn en hún fór illa að ráði sínu og lét Birnu verja frá sér.

Þórdís Hrönn rétt missti af boltanum úr dauðafæri fyrir Blika og á lokasekúndunum lét Sandra stöllu sína í Blikamarkinu verja aftur frá sér úr dauðafæri. Fjörugum leik lauk með 2-0 sigri Þórs/KA, sanngjarn sigur.



Akureyringarnir pressuðu vel í fyrri hálfleik og uppskáru sigurmörkin þá. Þær voru yfirvegaðar í sínum aðgerðum, spiluðu fína vörn og Chantel örugg í markinu. Þá hefðu þær átt að bæta við eftir að hafa skapað sér dauðafæri í seinni hálfleik líka.



Blikar voru ekki sannfærandi og í raun reyndu þær ekki nóg á Akureyringana. Þær voru einfaldlega lakari aðilinn í dag.



Þór/KA er efst í deildinni með 13 stig eftir sigurinn en Blikar áfram með 10.

Rakel Hönnudóttir: Með hnút í maganum í dag

"Þetta var alls ekki nógu gott og þetta er líklega einn lélegasti leikur sem ég hef séð liðið spila," sagði Rakel Hönnudóttir, Bliki.

"Við lögðum upp með það sama og alltaf, að spila hratt milli manna en það gekk alls ekki upp. Það voru alltof margar feilsendingar og það var eins og við værum hræddar við boltann. Þetta flæktist voðalega mikið fyrir okkur í dag. En þetta er bara einn leikur og við lætum af þessu."

Rakel er fyrrum fyrirliði Þórs/KA en hún fór frá Akureyri til Blika eftir síðasta sumar. "Það var pínu stressandi fyrir mig að spila í dag og ég var með hnút í maganum áður en ég kom. En það fylgir þessu. Það er samt alltaf gaman að koma norður," sagði Rakel.

Jóhann Kristinn Gunnarsson: Maður má ekki vera frekur

"Ég er auðvitað himinlifandi að við fenugm ekki á okkur mark og skorum tvö gegn þessu sterka liði Blika. Ég tel líka að við eigum sitthvað inni varðandi bæði form og spilamennsku og ég er því mjög ánægður," sagði þjálfari Þórs/KA eftir leikinn.

"Við erum að spila gegn hörku liði og þegar maður gerir það skiptir ekki alltaf máli hvað maður setur á töfluna. Það er hugarfarið sem skiptir máli og liðið sem vill vinna meira það gerir það. Þannig verður þetta í allt sumar."

Þórsarar nýttu sér vindinn mun betur en Blikar, kunna líklega betur á norðanáttina. Til dæmis sendu þær hættulegar sendingar innfyrir Blikavörnina og pressuðu miklu betur þegar Blikar sóttu gegn vindi í fyrri hálfleik, sem virkaði vel.

"Maður er alltaf hræddur við að hafa vindinn í fangið í seinni hálfleik en við tækluðum þetta mjög vel. Maður má ekki vera of frekur en við sköpuðum okkur líka dauðafæri til að skora fleiri mörk," sagði þjálfarinn.

Þór/KA er eitt á toppnum eftir leiki kvöldsins, en það kemur Jóhanni ekki mikið á óvart. "Við ákváðum það fyrir löngu þegar það var allt í gangi hérna að við ætluðum ekki að vera í neinu miðjumoði. Þessvegna segjum við hérna að árangurinn sé ekkert að koma á óvart."

"Það hafa allir hérna lent í þessu áður, að vera í miklum breytingum milli tímabila og missa sterka leikmenn, en kjarninn er sterkur og hann er sjóaður í að halda haus. Kjarninn er ekkert í neinu rugli og þegar grunnurinn er góður þá gengur þetta," sagði Jóhann.