Stærstu evruríkin samþykkja áætlun um að styðja við hagvöxt

Leiðtogar fjögurra stærstu evruríkjanna, Þýskalands, Frakkalands, Ítalíu og Spánar, samþykktu í gær að vinna eftir áætlun til þess að efla og styðja við hagvöxt á evrusvæðinu. Angela Merkel, kanslari Þýskalands, Mario Monti, forsætisráðherra Ítalíu, Francois Hollande, forseti Frakklands, og Mariano Rajoy, forsætisráðherra Spánar, hittust á vinnufundi um helgina og samþykktu áætlunina, sem embættismenn landanna höfðu unnið að síðustu vikur.

Um 130 milljarðar evra, ríflega 21 þúsund milljarðar króna, hafa verið eyrnamerktir í áætlunina, að því er breska ríkisútvarpið BBC greindi frá í morgun.

Samkvæmt frétt BBC er einkum horft til þriggja þátta með áætluninni. Í fyrsta lagi verður fjármagn Fjárfestingabanka Evrópu aukið um 10 milljarða evra, sem síðan fara í að efla fjárfestingu með lánveitingum. Í öðru lagi að nýta til fulls fjármuni sem til reiðu eru í sjóðum Evrópusambandinsins sem bundnir eru við ákveðin svæði innan Evrópu, og í þriðja lagi að fjármagna verkefni sem liggja þvert á landamæri, svo sem samgöngumannvirki, sem styrkir samkeppnishæfni álfunnar í heild og skapar atvinnu.

Þá er einnig horft til fleiri þátta, svo sem skatta á fjármagnshreyfingar, sem eiga að styrkja fjárhag evruríkjanna og gera þeim mögulegt að örva hagvöxt og snúa vörn í sókn þegar kemur að fjárfestingum. Áætlunin er hugsuð til lengri tíma, en mörg verkefna munu þó fara strax af stað.

Sjá má frétt BBC um þessi mál hér.