Alonso og Vettel gætu lifað af saman hjá Ferrari

Stefano Domenicali, liðstjóri Ferrari liðsins, er viss um að Fernando Alonso og Sebastian Vettel gætu lifað af sem liðsfélagar hjá Ferrari-liðinu. Mikil óvissa hefur ríkt um hver verði liðsfélagi Alonso á næsta ári.

Felipe Massa hefur ekki ekið eins og Ferrari-ökuþór sæmir undanfarin ár og nú er sæti hans orðið það heitt að yfirmenn hans eru farnir að líta í kringum sig. Ummæli Domenicali um Vettel hafa aðeins kastað olíu á eldinn í þeim efnum.

"Ég held að þeir séu báðir bráðsnjallir gæjar og gætu vel lifað af sem liðsfélagar," sagði Domenicali við Sport Bild og Auto Bild.

Bernie Ecclestone tók í sama streng í sama viðtali og sagði að liðsskipanin myndi ekki verða til vandræða. "Þetta yrði ekkert vandamál. Báðir eru endalaust að leita að nýjum áskorunum. Það að vera liðsfélagi helsta keppinautar þíns er helsta áskorun hvers ökumanns."

Sögurnar af liðsfélögum Alonso eru margar skrautlegar. Mikið veður var til dæmis gert útaf erjum milli Alonso og Lewis Hamilton þegar báðir óku fyrir McLaren-liðið árið 2007. Alonso skildi við liðið í fússi og gekk aftur til liðs við Renault þar sem hann fékk að vera númer eitt.

Hann gekk svo til liðs við Ferrari þar sem fyrir var Felipe Massa. Sá liðsfélagi á ekki séns í Alonso, sem er af mörgum talinn einn sá besti, ef ekki sá besti, ökumaður í Formúlu 1 síðari ára. Sebastian Vettel flokkast auðvitað í sama flokk og Alonso, með þeim bestu. Það yrði því fróðlegt að sjá hvernig samstarf þessara ökuþóra myndi þróast.