Webber endurnýjar samninginn við Red Bull

Mark Webber, ökumaður Red Bull-liðsins í Formúlu 1, hefur endurnýjað saming sinn við heimsmeistaraliðið. Hann skrifaði undir árslangan samning. Liðsfélagi Webbers verður áfram Sebastian Vettel.

Talið var að Webber hefði fengið nóg af takmarkaðri athygli frá liðinu sem í fyrra einblíndi á Vettel þegar hann raðaði upp mótsigrum hvað eftir annað. Yfirburðir Vettels hafa hins vegar dvínað í ár og Webber er nú í sterkri stöðu til að berjast við Fernando Alonso um heimsmeistaratitilinn.

Vegna þess hve óánægður Webber var talinn héldu spekingar að hann væri í þann mund að skrifa undir samning við Ferrari. Þar mundi hann verða liðsfélagi Alonso og taka sæti Felipe Massa sem, fram til breska kappakstursins um liðna helgi, hefur ekki staðið sig vel.

Webber hefur ekið fyrir Red Bull síðan árið 2007 þegar hann kom frá Williams-liðinu. Hann ók sinn fyrsta Formúlu 1 kappakstur fyrir Minardi á heimavelli í Melbourne í Ástralíu árið 2002. Í sínu fyrsta móti endaði hann í sjötta sæti og náði einu stigi.

Frá Minardi fór þessi 35 ára gamli ökuþór til Jaguar, sem síðar varð Red Bull.

Webber segist vera ánægður með nýja samninginn.