Starfsmenn fleiri banka gegndu lykilhlutverki í Libor-hneykslinu

Nýjar upplýsingar úr dómsskjölum sem lögð hafa verið fram benda til þess að hópar verðbréfamiðlara frá þremur evrópskum bönkum hafi gegnt lykilhlutverki í markaðsmisnotkun með svokallaða LIBOR-vexti, millibankavexti á fjármálamarkaði, en það eru þeir vextir sem almennt gilda á markaði fyrir lánsfé á milli bankastofnana. Millibankavextir eru breytilegir og fara eftir kjörum á markaði hverju sinni.

Libor, sem er skammstöfun fyrir London Interbank Offered Rate, eru þeir vextir sem stærstu bankarnir í Lundúnum nota þegar þeir lána hvor öðrum.

Þeir verðbréfamiðlarar sem taldir eru hafa gegnt lykilhlutverki í svindli með þessa vexti störfuðu hjá bresku bönkunum Barclays og Royal bank of Scotland og svissneska bankanum UBS, að því er Reuters greinir frá.

Margir þessara manna gegna enn lykilstöðum hjá öðrum fjármálafyrirtækjum á Wall Street.

Fréttin um markaðsmisnotkun með Libor-vextina er eitt stærsta hneykslið í fjármálaheiminum í langan tíma en til þessa hefur athyglin aðallega beinst að Barclays bankanum sem í síðasta mánuði gerði 453 milljóna dollara sátt við bandarísk og bresk stjórnvöld vegna málsins.

Þá baðst stjórnarformaður bankans afsökunar í gær fyrir hönd bankans þegar afkoma á fyrrihluta þessa árs var kynnt, en hagnaður Barclays fyrir skatta jókst um 13 prósent á fyrstu sex mánuðum ársins og nam 4,2 milljörðum punda, jafnvirði 840 milljarða króna.