Segir að forstjóri AGS valdi alls ekki starfi sínu

Peter Doyle einn af reyndustu hagfræðingum Alþjóðagjaldeyrissjóðsins (AGS) hefur látið af störfum. Hann gagnrýnir AGS harðlega í bréfi til stjórnarformanns sjóðsins og segir m.a. að þar á bæ skorti leiðtogahæfileika og að Christine Lagarde fyrsti kvenforstjóri sjóðsins valdi alls ekki starfi sínu.

Doyle segist einnig skammast sín fyrir að hafa starfað fyrir sjóðinn. CNN hefur afsagnarbréf Doyle undir höndum og hefur birt efnisatriði þess.

Helsta gagnrýni Doyle, sem starfað hefur sem hagfræðingur hjá sjóðnum í 20 ár, er að stjórn sjóðsins hafi alltof seint varað ráða- og dáðlausa stjórnmálamenn á evrusvæðinu við í hvað stefndi á svæðinu. Með því hafi íbúarnir í verst settu löndunum á evrusvæðinu þurft að líða miklar þjáningar og að verra sé í vændum.

Þá segir Doyle að skortur á afgerandi aðgerðum hjá sjóðnum hvað evrusvæðið varðar hafi leitt til þess að evran sé að falli komin en sú mynt er næststærsta gjaldeyrisforðamynt heimsins.