Cassano lætur Galliani heyra það

Antonio Cassano er orðinn leikmaður Inter og hann beið ekki boðanna með að senda stjórnarformanni AC Milan, Adriano Galliani, tóninn á blaðamannafundi.

"Það var ekki ég, þjálfarinn eða aðrir leikmenn sem gerðu mistök hjá Milan. Það var maður fyrir ofan okkur. Mér var lofaður samningur sem aldrei kom. Þið vitið hver þessi maður er en ég vil ekki nefna hann á nafn," sagði Cassano reiður.

Hann þakkaði þó öðrum hjá félaginu fyrir. Sagðist ekki eiga í útistöðum við neina aðra hjá Milan en Galliani.

Cassano segist hafa farið þar sem hann var orðinn fimmti eða sjötti kostur hjá þjálfara Milan.