Spenna á mörkuðum vegna nýs síma með þráðlausri hleðslu

Spennu gætir nú á mörkuðum vegna atburðar sem forsvarsmenn Nokia og Microsoft hafa skipulagt í sameiningu í New York í dag. Talið er að Nokia muni frumsýna nýjan Windows 8 síma.

Nýi snjallsíminn er kallaður Lumia 920. Hann mun styðjast við þráðlausa hleðslu, fyrstur sinnar tegundar. Líkt og fyrri snjallsímar í Lumia-vörulínunni verður nýi síminn knúinn af Windows Phone stýrikerfinu.

Þá verður síminn minni en forverinn, Lumia 820, að því er bandarískir miðlar hafa greint frá í morgun. Örgjörvi símans verður 1.5GHz, minnið verður 1 gígabæti en geymslupláss hans verður að öllum líkindum 32 gígabæt, ef marka má skrif á tæknifréttasíðum um símann.

Allt mun þetta þó skýrast í dag, þegar síminn verður formlega kynntur í New York.

Sjá má frétt breska ríkisútvarpsins BBC, um nýja Nokia Windows 8 símann, hér.