Kenningar á lofti um óánægju Ronaldo

Spænskir fjölmiðlar fjölluðu ítarlega um ummæli Cristiano Ronaldo eftir 3-0 sigur Real Madrid á Granada í gær.

Ronaldo sagðist ekki vera ánægður og að félagið vissi ástæður þess. Nú halda spænskir fjölmiðlar því fram að Ronaldo hafði fundað með Florentino Perez, forseta Real Madrid, um helgina og greint honum frá þessu.

Útvarpsstöðin Cadena Ser heldur því fram að það sé ósætti á milli leikmanna í liðinu og að honum finnist hann ekki metinn að verðleikum. Aðrir fjölmiðlar segja að hann sé óánægður með að honum hafi ekki verið boðinn nýr samningur við félagið, þó svo að hann eigi enn þrjú ár eftir af núverandi samningi.

Þá er því enn fremur haldið fram að Ronaldo hafi verið ósáttur við ummæli Marcelo, liðsfélaga síns. Marcelo sagði að Iker Casillas ætti skilið að fá Gullbolta FIFA fyrir frammistöðu sína á árinu.

Enn aðrir segja að Ronaldo sé ósáttur við ósanngjarna frakomu félagsins við nokkra leikmenn sem hann telur til vina sinna. Meðal þeirra má nefna Kaka, Ricardo Carvalho og Fabio Contreao.

Þá þykir öðrum fjölmiðlum þetta vera gert í þeim eina tilgangi að fá betri samning við félagið og hærri laun. Hvort sem það er rétt er ljóst að Ronaldo á ekki möguleika á að færa sig um set fyrr en á nýju ári og því hafa forráðamenn Real Madrid tíma til að bregðast við þessu útspili kappans.