Stuðningsmenn Milan brjálaðir út í Robinho

Það logar allt stafna á milli hjá AC Milan enda gengur hvorki né rekur hjá félaginu þessa dagana. Um helgina gerði liðið 1-1 jafntefli gegn Parma og hefur aðeins unnið tvo leiki af sjö í vetur.

Til að bæta gráu ofan á svart eru stuðningsmenn liðsins nú brjálaðir út í Brasilíumanninn Robinho eftir að hann neitaði að klappa fyrir stuðningsmönnum félagsins eftir leik helgarinnar en þeir komu langt að.

Daniele Bonera, leikmaður Milan, hefur tekið upp hanskann fyrir félaga sinn og segir að hann hafi einfaldlega verið svo svekktur að hann hafi gleymt að þakka fyrir sig.

"Það er ótrúlegt að fylgjast með þessari umræðu. Robinho var pirraður eftir leikinn og rauk þess vegna inn í klefa. Það var allt og sumt," sagði Bonera.

Ítalskir fjölmiðlar hafa velt því fyrir sér undanfarnar vikur hversu lengi Massimiliano Allegri muni hanga í starfi.