Hagi varar leikmenn Man. Utd við Cluj

Rúmenska goðsögnin Gheorghe Hagi, sem lék bæði með Real Madrid og Barcelona á sínum tíma, hefur varað leikmenn Man. Utd við því að vanmeta rúmenska liðið CFR Cluj en þau mætast í Meistaradeildinni á morgun.

"Man. Utd ætti að passa sig. Cluj er mjög gott lið og er þegar búið að vinna alla fimm Evrópuleiki sína í vetur," sagði Hagi en hann varar United sérstaklega við brasilíska miðjumanninum Rafael Bastos en hann hefur verið iðinn við kolann.

"Hann ber vitni um hversu sterkir útlendingar eru í liðinu. Það er mikið sjálfstraust í þessu liði. Þeir hafa spilað áður í Meistaradeildinni og náðu jafntefli gegn Chelsea. Þeir verða því ekki hræddir við Man. Utd.

"Liðið er mjög vel skipulagt og alls ekki auðvelt að brjóta það niður."