Alcoa skilaði rekstrarhagnaði

Álrisinn Alcoa, móðurfélag Fjarðaráls, skilaði hagnaði af rekstri sínum á þriðja ársfjórðungi ársins þvert á væntingar sérfræðinga sem spáð höfðu engum hagnaði eða jafnvel tapi á ársfjórðungnum.

Rekstrarhagnaður Alcoa nam 32 milljónum dollara eða tæpum fjórum milljörðum kr. Í frétt CNNMoney um málið segir að hlutabréf í Alcoa hafi hækkað um 0,7% í utanmarkaðsviðskiptum í nótt eftir að uppgjörið var gert opinbert.

*

Í fréttinni segir að ef tekið er tillit til sérstakra liða í uppgjörinu, það er málaferla og kostnaðar við mengunarvarnir í New York ríki vegna þeirra, varð 143 milljóna dollara tap hjá Alcoa á ársfjórðungnum.