Massa fær fimm sæta refsingu á ráslínu

Felipe Massa, ökuþór Ferrari í Formúlu 1, fær fimm sæta refsingu á ráslínunni fyrir bandaríska kappaksturinn sem hefst nú eftir tæpan klukkutíma. Alonso færist því úr áttunda sæti í það sjöunda og yfir á hreinni hluta brautarinnar.

Þetta er taktísk ákvörðun fyrir Ferrari-liðið fyrir báða ökumenn sína. Refsingin er framkölluð með því að brjóta innsigli á gírkassa Ferrari-bíls Massa.

Massa og Alonso áttu að ræsa vinstra megin á brautinni, sem er mun skítugari og sleipari en hægra megin.

"Þetta er sleipara en í rigningunni," sagði Massa eftir tímatökurnar í gær þegar hann var spurður út í stöðu sína á brautinni. Lewis Hamilton, ökuþór McLaren, sagðist jafnframt hafa meiri áhyggjur af því að rástaður hans í öðru sæti væri vinstra megin, og á sleipari hluta brautarinnar, en að hann kæmist klakklaust í gegnum fyrstu beygju.

Massa ræsir því ellefti í kappakstrinum og Fernando Alonso í sjöunda sæti. Lewis Hamilton og McLaren-liðið ætlar ekki að bregðast við eins og Ferrari og Red Bull-liðið segist ekki hafa áhyggjur af þessu.

Vildi láta hreinsa brautinaHamilton vildi í raun láta hreinsa brautina þar sem hann ræsir. "Ég talaði við Charlie Whiting, dómarana, mótstjórann og meira að segja eiganda brautarinnar," sagði Hamilton. "Vonandi hefur einhver farið út með kúst."

Margir ökumenn hafa kvartað yfir því að ræsa hægra megin. Allir telja sig vera í mun verri stöðu en þeir hægra megin og fyrir aftan þá.