Archduke Joseph demanturinn seldur á 2,7 milljarða

Einn af þekktustu demöntum heimsins, Archduke Joseph demanturinn, var seldur á uppboði hjá Christie's í Sviss fyrir 21 milljón dollara eða 2,7 milljarða króna.

Demantur þessi sem er 76 karöt að stærð er algerlega gallalaus en hann fannst í hinum þekktu Golconda demantanámum í Indlandi. Hann var áður m.a. í eigu Joseph August hertoga Austurríkis á millistríðsárunum á síðustu öld.

Verðið sem fékkst fyrir þennan demant var um 6 milljónum dollara hærra en matsverð hans fyrir uppboðið.

Meðal annarra þekktra demanta sem fundist hafa í Colconda námunum eru Koh-i-Noor og hinn blái Hope demantur.