Ecclestone: Ég er ekki orðinn of gamall

Bernie Ecclestone, alráður í Formúlu 1, svaraði Luca di Montezemolo, framkvæmdastjóra Ferrari-bílaverksmiðjanna, fullum hálsi eftir að hafa frétt frá Luca að hann væri orðinn of gamall til að stjórna Formúlu 1. Hann segist ekkert ætla að slaka á.

"Mér finnst ekki eins og ég sé 82 ára," sagði Ecclestone. "Ég er núna á leiðinni til Istanbúl til að koma tyrkneska kappakstrinum aftur á koppinn og svo ætla ég að taka þátt á ráðstefnu FIA. Ég stoppa svo ekki þarna, ég er með þúsund hugmyndir í viðbót."

"Er ég í svona lélegu formi? Það eru varla tvær vikur síðan bandaríski kappaksturinn fór fram eftir að ég nánast bjó hann til."

"Ég er 82 ára en fyrir löngu, þegar di Montezemolo var bara fertugur, þurfti ég að ræða málin við 88 ára gamlan herramann að nafni Enzo Ferrari. Trúðu mér, þrátt fyrir háan aldur hans, skalf ég því hann var svo strangur, óvæginn og skýr."

Enzo Ferrari, fyrir þá sem ekki vita, stofnaði Ferrari-verksmiðjurnar og rak fyrirtækið þar til hann lést árið 1988, 90 ára gamall.

Ecclestone segir samt allt í góðu milli hans og núverandi yfirmanns hjá Ferrari, þrátt fyrir þetta fjölmiðlafár yfir aldri alráðsins.

Bernie hefur grætt mikið á Formúlu 1 en fyrirtæki hans, FOM (Formula One Management) á sjónvarpsréttinn af kappakstrinum. Eignir hans eru metnar á 2,8 milljarða bandaríkjadala.