Matthíasar Mána leitað við Eyrarbakka

Fjölmennt lið lögreglunnar á höfuðborgarsvæðinu leitar nú að Matthíasi Mána Erlingssyni, strokufanga af Litla-Hrauni. Samkvæmt upplýsingum frá lögreglu er nú leitað á Eyrarbakka, steinsnar frá Litla-Hrauni.

Ásamt lögreglumönnum taka björgunarsveitarmenn og fangaverðir af Litla-Hrauni, sem kunnugir eru staðarháttum, þátt í leitinni á Eyrarbakka.

Þyrla Landhelgisgæslunnar flaug yfir svæðið fyrr í dag. Að sögn lögreglu hafa fjölmargar vísbendingar borist.

Þannig hefur leitin verið tvíefld, enda er sólin aðeins á lofti í örfáa klukkutíma nú þegar styttist í vetrarsólstöður.