Real Madrid náði aðeins jafntefli á heimavelli

Real Madrid tapaði tveimur mikilvægum stigum þegar liðið náði aðeins jafntefli á heimavelli 2-2 gegn Espanyol. Espanyol jafnaði metin tveimur mínútum fyrir leikslok.

Sergio Garcia kom Espanyol yfir á 31. mínútu eftir góða sendingu frá Verdú. Cristiano Ronaldo jafnaði metin þegar ein mínúta var komin fram yfir venjulegan leiktíma í fyrri hálfleik eftir undirbúning Sami Khedira.

Fabio Coentrao kom Real Madrid yfir á þriðju mínútu seinni hálfleiks eftir sendingu Ronaldo en Juan Albin jafnaði metin rétt fyrir leikslok.

Real Madrid er því með 33 stig eftir 16 umferðir, fjórum stigum á eftir Atletico Madrid og tíu stigum á eftir Barcelona áður en þau lið mætast nú í kvöld.

Espanyol er í 19. sæti með 12 stig.