Sátt við stjúpmóður

Leikkonan Liv Tyler er ánægð með væntanlega eiginkonu föður síns, hins 63 ára Stevens Tyler úr hljómsveitinni Aerosmith og Idol-dómara. Hún heitir Erin Brady og er 38 ára en Liv er sjálf aðeins fjórum árum yngri.

Steven og Brady trúlofuðu sig um jólin og Liv segist vera mjög ánægð með væntanlega stjúpmóður sína. „Þau hafa verið saman í langan tíma," sagði hún. „Mér líkar mjög vel við hana." Orðrómur hafði verið uppi um að fjölskylda Stevens væri óánægð með trúlofunina en svo virðist ekki vera.

Liv er þessa dagana að kynna sína nýjustu kvikmynd, Robot and Frank. Hún mun brátt feta í fótspor föður síns á tónlistarbrautinni því hún syngur lagið I Need You Tonight með INXS í nýrri auglýsingu fyrir tískumerkið Givenchy. „Það var skemmtilegt, stressandi og yndislegt," sagði hún.