Starfar með Aliciu Keys

Tónlistarmaðurinn Justin Vernon, forsprakki Bon Iver, tók nýverið upp nokkur lög með Aliciu Keys. Hann er einnig að undirbúa nýja plötu með hljómsveitinni Volcano Choir og er að vinna með annarri sveit sem kallar sig The Shouting Matches.

Vernon sagðist í viðtali við USA Today ekki búast við því að ný plata með Bon Iver komi út næstu þrjú árin. „Þau gætu reyndar orðið fimm," sagði hann. „Það fer eftir því hvenær lögin koma til mín. Ég verð eiginlega að bíða þangað til þau birtast."

Bon Iver er tilnefnd til fernra Grammy-verðlauna en hátíðin verður haldin 12. febrúar.