Fullorðnir fara í heljarstökk

Marga dreymir um að komast í heljarstökk, flikkflakk og splitt en telja alla von úti sökum aldurs. Sú er þó síður en svo raunin.

Fullorðinsfimleikar eru bæði fyrir byrjendur og þá sem eru að rifja upp gamla takta. Það eru engar kröfur um getu heldur fer fólk þetta bara á sínum hraða, segir Karen Jóhannsdóttir, fimleikaþjálfari hjá Fjölni.

Karen segir fullorðinsfimleikana leggja áherslu á styrk, þol og það að hafa gaman. Þetta er oft eina líkamsræktin sem fólk stundar svo við pössum upp á að hafa sitt lítið af hverju. Mestu máli skiptir samt að fólk skemmti sér vel, segir hún. 

Fullorðinsfimleikarnir hjá Fjölni byrjuðu af alvöru síðasta vetur og varð strax sprenging í aðsókn. Stór hluti þess hóps er mættur aftur til leiks þennan veturinn. Það kemur fólki oft mjög á óvart hvaða árangri það nær, þrátt fyrir aldur og fyrri störf.

Í fyrra voru margir sem byrjuðu hjá okkur sem hafði dreymt um að komast í handahlaup eða heljarstökk í mörg ár og voru að ná því með glæsibrag í lok vetrar. Það kom þeim sjálfum hvað mest á óvart, segir Karen og hlær. Hún segir skemmtilegt að fylgjast með fólki láta æskudrauminn rætast.

Það var ein kona í fyrra sem fór í heljarstökk og öskraði af gleði þegar hún lenti standandi í fyrsta skipti, rifjar hún upp. Fyrsta æfing vetrarins var haldin nú á mánudag og mættu þangað um þrjátíu manns en tímarnir eru opnir fyrir alla 18 ára og eldri, bæði karla og konur.

Fjönir er ekki eina íþróttafélagið sem býður upp á fullorðinsfimleika því flest íþróttafélög eru farin að bjóða upp á þá. Sæunn Viggósdóttir, íþróttafulltrúi hjá Glímufélaginu Ármanni segir einnig hafa verið um þrjátíu manns á fyrstu æfingu á mánudaginn. Við höfum boðið upp á fullorðinsfimleika lengi vel en gríðarleg uppsveifla hefur þó verið síðustu ár, segir hún.

Fleiri íþróttafélög sem bjóða upp á fullorðinsfimleika eru til dæmis Gerpla, Björk, Grótta og Fimleikafélag Akureyrar, en samkvæmt óformlegri könnun má gera ráð fyrir að iðkendur hérlendis hlaupi á hundruðum.

tinnaros@frettabladid.is