Fyrirsætustarf er líkt og að vinna í lottói

Cameron Russell hvetur ungar stúlkur til þess að velja sér annan starfsferil en fyrirsætustarfið.

Fyrirsætan Cameron Russell var ræðumaður á TED talk-ráðstefnu sem fram fór í Washington í október. Hún ræddi meðal annars staðalímyndir og fyrirsætustarfið. Russell hefur starfað sem fyrirsæta í átta ár og sýnt fatnað fyrir Chanel, Louis Vuitton, Prada og Victoria‘s Secret.

Fjöldi ungra stúlkna spyr hana daglega hvort þær geti einnig orðið fyrirsætur þegar þær vaxa úr grasi og velti Russell því fyrir sér af hverju þær kjósa þann starfsferil. „Fyrsta svar mitt er: Ég veit það ekki, ég ræð því ekki. Næsta svar mitt, og það mikilvæga, er: Af hverju? Þú getur orðið hvað sem er. Þú gætir orðið forseti Bandaríkjanna, vísindamaður eða hjartaskurðlæknir og ljóðskáld. Ef þær, þrátt fyrir þetta, vilja enn gerast fyrirsætur segir ég: Vertu yfirmaður minn. Ég ræð engu. Þú gætir orðið ritstjóri, framkvæmdastjóri H&M eða næsti Steven Meisel. Að vilja verða fyrirsæta er eins og að segjast vilja vinna í lottói þegar þú verður eldri. Það er ekki á þínu valdi og er ekki ferill,“ sagði Russell. Hún sagði samfélagið hafa skapað staðlaða ímynd yfir fegurð og að heppnin ein hafi orðið til þess að hún féll inn í þá ímynd. „Heppnin ein varð til þess að ég hlaut alla þessa kosti í vöggugjöf.“