Newey: Við erum á eftir áætlun

Nú þegar keppnisliðin í Formúlu 1 keppast við að leggja lokahönd á keppnisbíla sína fyrir næsta tímabil eru heimsmeistarar Red Bull í vandræðum, að sögn Adrian Newey, aðalhönnuðar og tæknistjóra liðsins.

"Við vorum að uppfæra 2012-bílinn (RB8) alveg þar til í næst síðustu keppninni," sagði Newey. "Það þýðir að í stað þess að byrja á nýja bílnum strax í haust, eins og venja er, þá var veturinn alltaf að fara að verða mjög annasamur."

"Við fórnuðum áætlunum okkar fyrir RB9-bílinn fyrir þessar síðbúnu uppfærslur. Það var auðvitað það rétta í stöðunni en nú erum við í eltingaleik við hin liðin."

Ekki hefur enn verið ákveðið hvenær hulunni verður svipt af nýja bílnum en fyrstu æfingar ársins hefjast á Jerez-brautinni á Spáni í byrjun febrúar. Red Bull gæti hugsanlega misst af þeim mikilvægu prófunum.

Red Bull-liðið hefur verið fararbroddi hvað tækninýjungar og tækniútfærslur varðar síðastliðin ár en breyting gæti orðið á þessu í ár.



Ferrari í góðum málumÁ meðan Red Bull-liðið er í vandræðum er Ferrari-stjórinn Stefano Domenicali viss um að Ferrari-liðið sé í góðum málum. Ferrari hóf síðustu vertíð í vandræðum en bíll síðasta árs reyndist í upphafi ekki á pari við væntingar og keppinauta.

"Það sem gerðist í Jerez í fyrra mun ekki koma fyrir í ár," sagði Domenicali. "Fyrstu mótin á næstu vertíð munu setja tóninn fyrir allt tímabilið því liðin munu ekki vinna eins lengi að keppnisbílum ársins 2013 eins og þeir gerðu árið 2012."

Domenicali bendir þar á nýjar tæknireglur sem verða innleiddar árið 2014 en þær hafa í för með sér minna vélarrúm, túrbínur og breyttan ramma sem hanna má bílana innan. "Liðin munu byrja að einbeita sér að 2014 ekki seinna en í júlí svo það verður mikilvægt að hafa sterkan bíl í upphafi."

Ferrari-liðið hefur heldur ekki ákveðið hvenær nýr Ferrari-bíll verður kynntur en sérfræðingar gera ráð fyrir að liðið taki þátt í fyrstu æfingunum á Jerez.