Internazionale í undanúrslit ítalska bikarsins

Miðvörðurinn Andrea Ranocchia tryggði Internazionale sæti í undanúrslitum ítölsku bikarkeppninnar í kvöld þegar hann skoraði sigurmark liðsins í framlengingu. Internazionale vann þá 3-2 heimasigur á Bologna.

Fredy Guarín og Rodrigo Palacio komu Internazionale í 2-0 en Bologna jafnaði metin með tveimur mörkum á síðustu tíu mínútunum. Alessandro Diamanti, fyrrum leikmaður West Ham, skoraði fyrra markið á 81. mínútu og Manolo Gabbiadini jafnaði metin þremur mínútum síðar.

Andrea Ranocchia skoraði sigurmarkið á 120. mínútu leiksins og mætir annaðhvort Fiorentina eða Roma í undanúrslitunum. Í hinum undanúrslitaleiknum mætast Lazio og Juventus.