Button fljótastur á fyrstu æfingum ársins

McLaren-liðið í Formúlu 1 hóf undirbúningstímabilið á toppnum því Jenson Button ók langhraðast um Jerez-brautina á Spáni í dag. Hann fór 0,8 sekúndum hraðar en Mark Webber á Red Bull-bíl.

Þó erfitt sé að fá mjög áreiðanlegar niðurstöður úr fyrstu æfingatímum ársins gefa þeir góða vísbendingu um hversu vel stödd liðin eru eftir hléið og vinnuna við teikniborðið. McLaren virðist standa þar vel að vígi.

Mercedes-liðið er hins vegar ekki í eins góðum málum en Nico Rosberg náði aðeins að fara 14 hringi um brautina í dag því rafmagnsvandamál í nýja W04-bílnum urðu til þess að bílnum var lagt inni í bílskúr. Besti hringurinn hans sem skilaði honum áttunda besta tíma dagsins segir því lítið um hversu fljótur nýi bíllinn er.

Marussia-liðið er jafnvel í enn meiri vandræðum því nýliðinn Max Chilton átti lélegasta tíma dagsins, fimm sekúndum hægari en Button og tveimur sekúndum hægari en aðalkeppinauturinn Giedo van der Garde á Caterham-bíl. Tæknimenn Marussia eiga því mikla vinnu fyrir höndum á næstu vikum.

Pastor Maldonado var eini ökuþórinn í dag sem ók ársgömlum bíl en Williams-liðið mun ekki frumsýna nýjan keppnisbíl fyrr en 19. febrúar áður en æfingalota tvö hefst í Barcelona. Hann ók 84 hringi í Jerez í dag eða næst flesta á eftir Paul di Resta á Force India-bíl sem fór 89.

Æfingarnar í Jerez halda áfram á morgun.

Úrslit dagsins

P	Ökuþór	Lið	Tími	Bil	Hringir
1	Button	McLaren	1:18,861		37
2	Webber	Red Bull	1:19,709	0,848	73
3	Grosjean	Lotus	1:19,796	0,935	54
4	di Resta	Force India	1:20,343	1,482	89
5	Ricciardo	Toro Rosso	1:20,401	1,540	70
6	Massa	Ferrari	1:21,000	2,139	64
7	Hulkenberg	Sauber	1:20,699	1,838	79
8	Rosberg	Mercedes	1:20,846	1,985	11
9	Maldonado	Williams	1:20,864	2,003	84
10	vd Garde	Caterham	1:21,915	3,054	64
11	Chilton	Marussia	1:24,176	5,315	29