Hagnaður GM 632 milljarðar

Hagnaður féll þó um 38% á milli ára.

Flestum fyrirtækjum þætti ágætt að skila á sjöunda hundrað milljarða króna hagnaði á síðasta ári en staðreyndin er sú að hagnaður GM féll um 38% milli ára. Árið 2011 hagnaðist General Motors um 1.020 milljarða króna.

Nokkrar skýringar eru gefnar á lækkun hagnaðarins, sú helsta erfið bílasala í Evrópu en einnig mikil framlög til lífeyrissjóða starfsmanna GM og miklar fjárfestingar. Þær upphæðir sem þar liggja að baki skýra þó ekki út mismuninn á hagnaði fyrirtækisins á milli ára og því hefur kostnaður í rekstri hækkað verulega eða að framlegð á hvern seldan bíl hefur lækkað mikið, eða hvorttveggja gerst í senn.

Þessi munur er ekki skýrður í fréttatilkynningu GM og ýmsir ósáttir við útskýringar fyrirtækisins. Dan Akerson forstjóri GM er þó bjartsýnn á þetta ár og segir að það muni setja á markað marga nýja og spennandi bíla í ár, en einnig gæta mjög að kostnaði.