Perez fljótastur á öðrum degi

McLaren-nýliðinn Sergio Perez ók hraðast um brautina í Barcelona í dag. Hann, heimsmeistarinn Sebastian Vettel, Lewis Hamilton, Kimi Raikkönen og Fernando Alonso höfðu skipst á að setja besta tíma allan daginn.

Það sem af er æfingunum í Barcelona þá lítur allt út fyrir að McLaren, Red Bull, Lotus og Mercedes séu í sérflokki á undan Ferrari, Williams, Force India, Toro Rosso og Sauber. Þó er erfitt að meta það á hringtímunum einum saman hvernig liðin standa fyrir keppnistímabilið.

Það er allt eins líklegt að Alonso hafi aðeins verið að kynna sér nýja Ferrari-kostinn enda ók hann ekkert í Jerez fyrir tveimur vikum. En það er nokkurnveginn ljóst að Caterham og Marussia-liðin munu enn á ný há baráttu neðst á listanum eins og þau gerðu í fyrra.

Áhugaverðast er að reyna að átta sig hvernig Mercedes-liðið stendur fyrir tímabilið. Hamilton er þó viss um að framför hafi orðið á bílnum síðan í Jerez. „Við erum bara að einbeita okkur að bílnum og að vinna í prógramminu fyrir fyrsta mótið. Það er allt í rétta átt," sagði hann.

„Í síðustu prófunum á Jerez virkuðu dekkin ekki alveg nógu vel því bíllinn var ekki alveg rétt stilltur. Hér [í Barcelona] er þetta allt annað."