Vaktir með lyfjaprófum

Formúlu 1-ökuþórarnir Fernando Alonso, Sergio Perez og Daniel Ricciardo fengu óvænta og snemmbúna heimsókn í gærmorgun þegar Alþjóðlega lyfjaeftirlitsnefndin leit við hjá þeim þremur.

„Klukkan er 6:42. Lyfjapróf." Þannig hljómaði tíst Alonso um atvikið. Perez, ökumaður McLaren, staðfesti einnig að hafa fengið heimsókn frá köllunum með pissdollur í gærmorgun.

Þá var Ricciardo vakinn heima hjá sér af sömu mönnum og segir það hafa verið vandræðalega uppákomu. „Sætti lyfjaprófi snemma í morgun," tísti Ástralinn og bætti svo við: „Allt í einu verður erfitt að pissa heima hjá sér þegar einhver stendur og horfir yfir öxlina á þér."

Lyfjaeftirliti er ekki aðeins við haldið á meðan keppnisvertíðinni stendur heldur er það allan allan ársins hring. Lyfjaeftirlitsaðilar geta því birst á tröppunum hjá hverjum sem, þegar þeir vilja. Sá háttur hefur verið hafður á lengi.

Árið 2002 féll tékkneski ökuþórinn Tomas Enge á lyfjaprófi þegar vottur af kanabis-efnum fannst í lífsýnum hans. Hann ók í þremur mótum fyrir Prost-liðið árið 2001 og hafði unnið meistaratitil ökuþóra í F3000 þegar lyfjaprófið var gert. Hann er eini Formúlu 1-ökuþórinn sem fallið hefur á lyfjaprófi.

Ógæfan hefur ekki enn yfirgefið Tékkann því síðasta sumar féll hann aftur á lyfjaprófi og má ekki taka þátt í mótorsporti í átján mánuði. Hann er því jafnframt eini Formúlu 1-ökuþórinn sem hefur fallið tvisvar á lyfjaprófi.