Ribery: Við viljum vinna þrennuna

Gengi Bayern München hefur verið frábært í vetur. Liðið er að rúlla upp þýsku deildinni, er komið í undanúrslit bikarkeppninnar og er með annan fótinn í átta liða úrslitum Meistaradeildar Evrópu.

Bayern er með 17 stiga forskot í deildinni og vann fyrri leikinn gegn Arsenal í sextán liða úrslitum Meistaradeildarinnar 3-1.

"Það gengur stórkostlega vel hjá okkur og vonandi heldur þetta góða gengi áfram. Það er samt mikið eftir og við verðum að halda einbeitingu," segir Frakkinn Franck Ribery, leikmaður Bayern.

"Það eru þrír titlar í boði og við viljum vinna þá alla."

Ribery hefur skorað fimm mörk og gefið níu stoðsendingar í átján leikjum í þýsku úrvalsdeildinni í vetur.