Bayern vann á sjálfsmarki

Bayern er komið með 20 stiga forystu á ný í þýsku úrvalsdeildinni eftir 2-1 sigur á Leverkusen á útivelli.

Mario Gomez kom Bæjurum yfir á 37. mínútu en Simon Rolfes náði að jafna metin fyrir heimamenn stundarfjórðungi fyrir leikslok.

Bayern hafði unnið átta leiki í röð í deildinni og Philipp Wollscheid sá til þess að þeir urðu níu en hann skoraði sjálfsmark aðeins þremur mínútum fyrir leikslok.

Þrátt fyrir gott gengi hefur liðið hlotið nokkra gagnrýni á síðustu vikum og þá helst eftir 2-0 tap gegn Arsenal í Meistaradeild Evrópu í vikunni. En liðið svaraði gagnrýnisröddunum með góðum sigri í dag.