Þór spilar í KA-litum gegn KR

Nú er nýhafinn leikur KR og Þórs í Lengjubikar karla í fótbolta en hann fer fram í Egilshöll. Fjölmargir leikir fara fram í Lengjubikarnum í dag.

Þórsarar eru þó í óvenjulegum litum í dag þar sem að búningarnir gleymdust heima á Akureyri. Því var bjargað með því að fá lánaða búninga frá Fjölni.

Hörðum Þórsurum er ef til vill illa við það enda eru Fjölnisbúningarnir gulir, líkt og hjá erkifjendunum í KA norðan heiða.

Þess má geta að Brynjar Björn Gunnarsson er í byrjunarliði KR í fyrsta sinn eftir að hann kom til félagsins frá Reading í Englandi. Þetta er hans fyrsti leikur með KR síðan hann fór frá liðinu í atvinnumennsku árið 1998.