Mikil reiði í herbúðum Inter

Það gengur lítið upp á knattspyrnuvellinum þessa dagana hjá ítalska stórliðinu Inter. Forseti félagsins, Massimo Moratti, er allt annað en sáttur við gang mála.

Liðið tapaði 1-0 um helgina gegn Bologna og svo steinlá það, 3-0, í síðustu viku gegn Tottenham í Evrópudeildinni.

"Það er mikil reiði í herbúðum félagsins en við verðum samt að halda ró okkar. Við verðum að meta stöðuna og reyna að byggja upp stemninguna á nýjan leik," sagði Moratti.

"Kannski er andlegur undirbúningur fyrir leiki ekki nógu góður. Við erum samt að kasta frá okkur leikjum og það er alvarlegt mál."

Þjálfari liðsins, Andrea Stramaccioni, er alls ekki öruggur með sína stöðu og Moratti neitaði að gefa honum traustyfirlýsingu.