Briatore: Webber og Vettel verða að skilja

Samband liðsfélaganna hjá Red Bull er orðið svo vont að það getur ekki haldið áfram árið 2014, segir Flavio Briatore, fyrrverandi liðstjóri Renault og Benetton í Formúlu 1. Briatore hefur verið umboðsmaður Mark Webber síðan 2001.

Samningur Webbers við Red Bull rennur út í lok ársins en Sebastian Vettel á samning út árið 2014.

Briatore var liðstjóri Benetton þegar Michael Schumacher vann sína fyrstu heimsmeistaratitla í Formúlu 1 árið 1994 og 1995 með liðinu. Hann var síðan bannaður frá Formúlu 1 árið 2009 eftir að hafa skipað Nelson Piquet, ökumanni Renault, að klessukeyra bílinn í Singapúr 2008 svo hinn liðsmaður Renault, Fernando Alonso, gæti unnið.

Briatore segir ákvörðun Vettel í kappakstrinum um síðustu helgi hafa verið síðasta naglann í kistuna fyrir samstarf þeirra félaga. Sambandið hafi þegar verið orðið formlegt og stirt. „Það er ekkert samband lengur," sagði Briatore við RAI-útvarpið.

„Nú segist Vettel vilja hjálpa Mark en mark vill enga hjálp. Hann hefði átt að vinna mótið og það er mögulegt að Vetel muni vinna öll mótin sem eftir eru."

Briatore segir horfurnar ekki góðar. „Ég held að svona samband verði ekki lagfært. Þeir eru atvinnumenn og munu vinna mót og svoleiðis, en það er óhugsandi að Mark hjálpi Vettel í framtíðinni og ég efast um að Vettel muni hjálpa Mark."

„Svo, nú eru tveir óvinir í einu liði sem gerir leikinn örugglega auðveldari fyrir Ferrari," sagði Briatore að lokum.