Alonso vann sannfærandi sigur á heimavelli

Spánverjinn Fernando Alonso, ökumaður Ferrari-liðsins í Formúlu 1, vann sannfærandi sigur í kappakstrinum á Spáni í dag. Alonso hefur ekki unnið í Barcelona síðan árið 2006 og voru heimamenn því himinlifandi.

Alonso var leiftursnöggur í kappakstrinum og vann sig upp í fyrsta sætið með sjallri herfræði og grimmd í brautinni. Það kristallaðist strax í ræsingu því í fyrstu tveimur beygjunum sýndi hann nákvæmlega hvað væri að fara að gerast í kappakstrinum; hann ætlaði sér að sigra.

Finninn Kimi Raikkönen kom fáum á óvart í öðru sæti á verðlaunapallinum í dag. Lotus-bíllinn hans hefur reynst vel og fer vel með dekkin. Ekki skemmir að Kimi er flinkur ökuþór og veit hvenær hann á að sækja og hvenær hann á að hugsa um dekkin.

Liðsfélagi Alonso hjá Ferrari, Felipe Massa, varð þriðji í kappakstrinum. Hann hafði ræst níundi og sótti hratt á. Eftir að ljóst var að Sebastian Vettel og Mercedes-mennirnir gætu ekki hlíft dekkjunum eins og Ferrari og Lotus var leikurinn auðveldur fyrir Massa.

Þeir Nico Rosberg og Lewis Hamilton voru einmitt í stökustu vandræðum með dekkin í keppninni. Mercedes-bílarnir virðast vera yfirstýrðir í höndum beggja ökuþóra sem gerir það að verkum að afturdekkin eru fljót að eyðileggjast og missa grip.

Rosberg náði þó að halda forystu gegn Vettel á fyrstu hringjum kappakstursins en nokkru eftir fyrsta viðgerðarhléið var ljóst í hvað stemmdi þegar keppinautarnir flugu fram úr hver á fætur öðrum. Hamilton var í vandræðum alveg frá fyrstu beygju. Rosberg endaði sjöundi og Hamilton í tólfta.

Jenson Button á McLaren kom skemmtilega á óvart og kom sér fyrir í áttunda sætinu eftir að hafa ræst fjórtándi. Hann féll í byrjun keppninnar í sautjánda sætið en vann sig svo upp listann og framfyrir liðsfélaga sinn Sergio Perez sem endaði níundi.

Toro Rosso-ökuþórinn Daniel Ricciardo var magnaður í kappakstrinum og lét stóru fiskana í lauginni hafa fyrir hlutunum. Hann endaði tíundi og sótti síðasta stigið sem var í boði.