Hraðskreiðasta sláttuvél heims

Að sjálfsögðu er Top Gear með puttana í því að skapa vitleysu eins og sláttuvél sem getur slegið gras á 210 kílómetra ferð. Það er samt Honda sem aðallega sér um smíðina á þessum gæðagrip, sem ætti náttúrulega að vera til á hverju heimili. Vélin verður með 110 hestafl mótor og nær 100 km hraða á 4 sekúndum. Það er hverri sláttuvél nauðsynlegt að mati Top Gear ætli menn ekki að vera allan daginn að slá hjá sér flötina.

Sláttuvélinni er ætlað að bæta núgildandi heimsmet hvað hraðskreiðustu sláttuvélina varðar. Núverandi hraðamet sláttuvéla er 155 km/klst. Top Gear verður með grein um þessa öflugu sláttuvél í næsta tölublaði sínu sem kemur út á þjóðhátíðardag okkar Íslendinga, 17. júní. Því verða lesendur að bíða í örfáa daga eftir nánari fréttum af þessum grip.

Það er ekki mikið eftir af hinni upphaflegu sláttuvél sem gripurinn er byggður á, en hún hefur fengið mótor úr Honda VTR1000F mótorhjóli, afturöxul úr go-kart bíl, stýrisbúnað úr Morris Minor og dekk af keppnisfjórhjóli.