Danski skatturinn krefur Novo Nordisk um 117 milljarða

Dönsk skattayfirvöld hafa krafið lyfjafyrirtækið Novo Nordisk um 5,5 milljarða danskra kr. eða um 117 milljarða kr. vegna vangoldinni skatta á árunum 2005 til 2009. Málið er sem stendur rekið fyrir Ríkisskattarétti landsins (Landssaktteretten).

Mál þetta er stærsta skattamál í sögu Danmerkur en fjallað var um það í  heimildarþætti á DR1 um helgina.

Forsaga málsins er sú að árið 2002 flutti Novo Nordisk dótturfélag sitt í skattaskjól í Sviss. Félag þetta heldur utan um einkaleyfi Novo Nordisk á þeim lyfjum sem Novo framleiðir.

Ekkert ólöglegt var við þennan flutning á félaginu en skattayfirvöld telja að verðmæti þess hafi verið stórlega vanmetið af Novo Nordisk þegar það var flutt til Sviss. Skatturinn krefst því þess að Novo Nordisk borgi danska skatta af tekjum dótturfélagsins upp á 22 milljarða danskra kr. á árunum 2005 til 2009.

Jesper Brandgaard fjármálastjóri Novo Nordisk segir í samtali við fréttastofu danska ríkisútvarpsins að fyrirtækið svíki ekki undan skatti. „Við borgum þá skatta sem okkur er ætlað að borga,“ segir Brandgaard. Hann bendir einnig á að fleiri mál séu í gangi milli Novo Nordisk og danskra skattyfirvalda og raunar í fleiri löndum. Það sé þó ekki þar með sagt að yfirtækið stundi skattsvik.

Novo Nordisk er stærsta fyrirtækið í kauphöllinni í Kaupmannahöfn, miðað við markaðsverðmæti. Það hefur einkum hagnast á framleiðslu lyfja gegn sykursýki en það er leiðandi í heiminum á því sviði.

Í fyrstu viðskiptum dagsins í kauphöllinni í morgun féllu hlutir í Novo Nordisk um tæp 2% og töpuðu hluthafar þar með rúmlega 9 milljörðum danskra kr. á eign sinni í fyrirtækinu.