Tvö rauð á Húsavík | Óvænt tap Hauka

Völsungur er enn án sigurs í 1. deildinni en Húsvíkingar misstu tvo menn af velli með rautt spjald í kvöld er liðið tapaði fyrir Víkingi, 3-1, sem kom sér um leið upp í annað sæti deildarinnar.

Haukar töpuðu óvænt fyrir Tindastóli norðan heiða í kvöld og þá hafði KA betur gegn Þrótti í Laugardalnum.

Sigurður Egill Lárusson kom Víkingum yfir á sextándu mínútu á Húsavíkurvelli en Sigvaldi Þór Einarsson fékk að líta fyrra rauða spjaldið í leiknum um stundarfjórðungi síðar.

Manni færri náðu Völsungar samt að jafna metin með marki Halldórs Orra Hjaltasonar í upphafi síðari hálfleiks en aðeins tveimur mínútum síðar endurheimti Dofri Snorrason forystuna fyrir gestina úr Fossvoginum.

Síðari brottvísunina fékk svo Guðmundur Óli Steingrímsson á 65. mínútu en Víkingar innsigluðu endanlega sigurinn með marki Sigurðar Egils á 89. mínútu.

Tveir aðrir leikir fóru fram í 1. deildinni í kvöld. Ivan Dragicevic var hetja KA sem vann 1-0 sigur á Þrótturum sem eru því enn í næstneðsta sæti deildarinnar með átta stig. Völsungur er á botninum með tvö.

Þá hafði Tindastóll betur gegn Haukum, 2-1. Steven Beattie kom Stólunum yfir en Hilmar Geir Eiðsson jafnaði metin fyrir Hauka áður en flautað var til hálfleiks. Sigurmarkið kom svo á 76. mínútu en þar var Elvar Páll Sigurðsson að verki.

Tindastóll hefur nú spilað fjóra deildarleiki í röð án taps en liðið er komið upp í níunda sæti deildarinnar með ellefu stig. Haukar duttu niður í þriðja sæti deildarinnar með tapinu í kvöld.