Totti búinn að framlengja við Roma

Hinn síungi leikmaður Roma, Francesco Totti, er ekki á þeim buxunum að hætta að spila fótbolta þó svo hann sé orðinn 36 ára gamall.

Totti hefur leikið með Roma allan sinn feril og hann er nú búinn að skrifa undir nýjan tveggja ára samning við félagið.

"Ég er viss um við munum ná árangri á þessum tíma. Ég vil þakka forsetanum fyrir að við náðum þessum samningi. Þetta var það sem allir vildu," sagði Totti.

Totti hætti að leika með landsliðinu eftir að Ítalía varð heimsmeistari árið 2006. Oft hefur verið óskað eftir því að hann snéri aftur í liðið en hann hefur ekki viljað verða við þeim óskum hingað til.

HM er fram undan í Brasilíu næsta sumar og Totti hefur opnað smá glugga á að vera með.

"Roma-treyjan er treyjan mín en ég er samt opinn fyrir þessum möguleika. Við sjáum hvað setur."