Gísli Marteinn Baldursson, þáttagerðamaður og fyrrverandi borgarfulltrúi, biðlaði til vina sinna á Facebook um að hjálpa sér við að velja nafn á nýja sjónvarpsþáttinn sinn sem tekur við af Silfri Egils í vetur.
Sagði Gísli að nafnið þyrfti að vera grípandi en þó laust við alla tilgerð. Eftir nokkra umræðu og fjölda uppástungna valdi Gísli nafnið Gísli Marteinn með Gísla Marteini sem hann hafði stungið upp á sjálfur stuttu áður.
Þátturinn verður beittur umræðuþáttur þar sem Gísli mun ræða við vini sína og fyrrum samstarfsfélaga um hvað þeir hafa verið að gera í vinnunni eftir að hann hætti í stjórnmálum og fór að stjórna helsta þætti landsins um stjórnmál.
Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu og er hún alveg hlutlaus.
Sannleikurinn: Nýr þáttur Gísla Marteins mun heita Gísli Marteinn með Gísla Marteini
