iPad 5 og iPad mini 2 kynntir á morgun

Fimmta kynslóðin af iPad spjaldtölvum verður kynnt á morgun sem og önnur kynslóð iPad mini. Kynningarathöfnin mun fara fram í San Francisco í Bandaríkjunum en mikil eftirvænting er eftir kynningunni eins og svo oft áður þegar Apple kynnir nýjar vörur.

Apple hefur alltaf gefið lítið út fyrirfram varðandi getu nýrra tækja en mikið af sögusögnum og orðrómum eru upp um hvað nýju spjaldtölvurnar muni bjóða upp á. Hér á eftir verða nokkrir möguleikar og nokkrar sögusagnir taldar upp.

Meðal þeirra eru að nýju tölvurnar muni keyra á iOS 7 stýrikerfinu, að iPad 5 verði léttari og þynnri en forverar sínir og líklegt þykir að hún verði einnig búin hraðvirkari örgjöva en iPad 4.

Einnig þykir líklegt að spjaldtölvurnar muni búa yfir betri betri myndavél og hún verði 8 megapixla en myndavélarnar voru 5 megapixla áður. Myndavélahugbúnaðurinn mun einnig verða betri og munu myndir verða skýrari og minna kornóttar. Þar að auki verður mögulega hægt að spila myndbönd í „slow motion“.

Nýr notkunarmöguleiki gæti einnig verið Touch ID, sem er fingrafaraskanni sem var á iPhone 5s og virðast notendur vonast eftir því. Notendur biðja einnig um lengri líftíma tækja fleiri liti og lægra verð, en ólíklegt þykir að það muni ganga eftir.

Apple hefur fram til þessa selt yfir 150 milljónir iPada, en þrátt fyrir það hefur sala lækkað undanfarið. Á fyrsta ársfjórðungi voru seldar 22,9 milljónir spjaldtölva þegar tvær nýjar tegundir voru kynntar niður í 14,6 milljónir á síðasta fjórðungi og virðast áhugasamir halda aftur af sér þar til nýja tækið kemur á markað.