Massa til Williams

Brasilíski ökuþórinn Felipe Massa hefur skrifað undir samning við Williams frá og með næsta tímabili.

Massa, sem var skipt út hjá Ferrari fyrir Kimi Raikkonen, hefur skrifað undir langtímasamning við Williams. Hann mun fylla í skarð Pastor Maldonado.

„Hann hefur afar mikla hæfileika og er mikill baráttuhundur á kappakstursbrautinni,“ sagði Sir Frank Williams sem öllu ræður hjá liðinu sem ber nafn hans.

„Honum fylgir einnig mikil reynsla um leið og við reynum að skrifa nýjan kafla í sögu liðsins.“

Massa var hársbreidd frá því að vinna sigur í keppni ökuþóra tímabilið 2008.