Lewandowski er betri en Mandzukic

Það er fastlega búist við því að pólski framherjinn Robert Lewandowski gangi í raðir Bayern frá Dortmund. Goðsögnin Franz Beckenbauer er spenntur fyrir því.

Samningur Lewandowski við Dortmund rennur út næsta sumar og því ekki ólíklegt að hann verði seldur í janúar. Annars fær Dortmund ekkert fyrir hann.

Beckenbauer segir að Lewandowski sé betri heldur en núverandi framherji liðsins, Mario Mandzukic.

"Alveg sama hversu góður Mandzukic er þá erum við alltaf að fá betri mann í Lewandowski. Hann er sterkari á boltanum og hreyfir sig betur. Það væri frábært að fá hann til Bayern hið fyrsta," sagði Beckenbauer.

Lewandowski er markahæstur í þýsku deildinni með níu mörk í tólf leikjum. Bayern og Dortmund mætast um helgina.