Róttækar breytingar í Formúlunni

Það verða gerðar ýmsar breytingar í Formúlu 1 fyrir næsta tímabil. Stærsta breytingin er sú að síðasta keppni tímabilsins telur tvöfalt.

Í von um að auka spennuna verður hægt að fá helmingi fleiri stig í síðasta kappasktrinum en í öllum hinum.

Sebastian Vettel hefur unnið síðustu fjögur ár og keyrði yfir andstæðinga sína í fyrra. Tímabilið var búið löngu fyrir lokakeppnina.

Ef þetta kerfi hefði verið í gangi á síðustu árum þá hefði Fernando Alonso stolið titlinum af Vettel árið 2012. Felipe Massa hefði einnig unnið árið 2008 í stað Lewis Hamilton.

Síðasta keppni á næsta tímabili fer fram í Abu Dhabi þann 23. nóvember.

Einnig verður sett á launaþak og svo munu ökumenn halda sínu númeri út ferilinn í stað þess að fá nýtt á hverju ári. Númer eitt verður þó tekið frá fyrir heimsmeistarann ef hann vill nota það.