Hátækniinngrip frá öðru landi

Belgacom, stærsta símafyrirtæki Belgíu, upplýsti í byrjun vikunnar um að brotist hafi verið inn í tölvukerfi þess, að því er virtist í þeim tilgangi að njósna.

Í tilkynningu Elio di Rupo, forsætisráðherra Belgíu, kemru fram að tilgangur innbrotsins virtist vera „markviss söfnun upplýsinga“ með tækni sem benti til „aðkomu annars lands“ að njósnunum.

Sérfræðingar Belgacom eru sagðir hafa uppgötvað rafræn fótspor í upplýsingatæknikerfum félagsins en hafi „tryggt öryggi kerfisins á ný“ núna um helgina. Njósnirnar hafi verið kærðar til ríkissaksóknara.

Hvorki ríkisstjórnin né Belgacom hafa nefnt hver kynni að vera á bak við árásina.

Njósnirnar uppgötvuðust hins vegar örfáum vikum eftir uppljóstranir Edwards Snowden um að bandarískar eftirlitsstofnanir hleruðu stofnanir Evrópusambandsins með aðsetur í Brussel. Evrópuráðið hefur sagst hafa farið fram á skýringar frá Bandaríkjunum. 

Belgacom segir viðskiptavini ekki hafa orðið fyrir óþægindum eða tjóni. „Vírusinn sem safnaði upplýsingum fannst bara í innra tölvukerfi Belgacom, ekki í fjarskiptanetinu,“ segir í yfirlýsingu fyrirtækisins.

Harðorð yfirlýsing stjórnvalda þykir hins vegar benda til þess inngripið hafi verið alvarlegt bæði að umfangi og eðli.

„Ef kenningin fæst staðfest og málið snýst í raun um rafrænar njósnir, þá fordæmir ríkisstjórnin inngripið harðlega, sem og að brotið sé með þeim hætti á trúverðugleika fyrirtækis í almannaeigu,“ segir í yfirlýsingunni. 

„Sé raunin sú þá tekur ríkisstjórnin í framhaldinu viðeigandi skref,“ segir þar jafnframt, án frekari útlistunar.