Volvo býr til sjálfstýrðan bíl

Bílaframleiðandinn Volvo í Svíþjóð hefur bæst í þann hóp framleiðenda sem keppa að því að framleiða sjálfstýrða bíla.

Fyrirtækið segist ætla að smíða hundrað slík farartæki í tilraunaverkefni, að því er fram kemur hjá fréttaveitu AP.

Fyrirtækið, sem er í kínverskri eigu, segir fyrirhugað að prófanir hefjist á völdum vegum, 50 kílómetrum í allt, í Gautaborg í Svíþjóð árið 2017.

Verkefnið er sagt fyrsta stóra tilraunin með bifreiðar sem aka sér sjálfar. Bílarnir eiga að ráða við alla þætti akstursins, þótt gert sér ráð fyrir að ökumaður sé til taks stöku sinnum. Lagning í stæði verður hins vegar alveg sjálfvirk og getur ökumaður farið á meðan bíllinn finnur stæði.

Það styttist í sjálfstýrða bíla með auknum möguleikum til að búa bíla tölvum og myndavélum.