Helgarmaturinn - Mexíkóskt picadillo

Sólveig Guðmundsdóttir rekur veitingastaðinn Culiacan og hefur alltaf haft áhuga á hollum og góðum mat. Hún kynntist mexíkóskri matargerð í Denver í Colorado þegar hún var að læra iðnhönnun. Hún segir fjölskylduna elska mexíkóskan mat sem gott er að eiga í ísskápnum að grípa í.

1 kg nautahakk (eða nauta- og grísahakk)

2 hvítlauksrif

1 stór laukur

2 dósir tómatar kubbaðir

2,5 dl nautasoð (vatn og teningur)

1½ dl rúsínur

1½ dl möndluflögur

2 msk. tómatpúrra

1 msk. kanill

1 msk. cumin

1 msk. kóríander

½ msk. chiliflögur

1 tsk. cayennepipar

1½ tsk. salt og ½ tsk. pipar

½ dl rauðvínsedik

Ferskt kóríander (má sleppa)

Léttsteikið hakkið með lauknum og hvítlauknum. Setjið kryddin út í og steikið þau aðeins með hakkinu. Restinni af innihaldi er hellt út á og látið malla í ca. 30 mínútur. Dreifið ferskum kóríander yfir rétt áður en borið er fram (má sleppa).

Þessi kássa er rosalega góð með tortillum. Hægt er að hafa t.d. ferskt salsa, sterka eða milda sósu, ost og sýrðan rjóma með. Svo er auðvitað æðislegt að hafa nachos og ostasósu með þessu. Uppskrift á culiacan.is.