Thiago með frábært sigurmark fyrir Bayern

Spánverjinn Thiago tryggði Bayern München enn einn sigurinn í þýsku úrvalsdeildinni í fótbolta í kvöld þegar liðið vann 2-1 sigur á Stuttgart á útivelli. Markið skoraði Thiago með stórglæsilegu viðstöðulausu skoti í uppbótartíma.  

Bayern-liðið hefur þar með leikið 43 deildarleiki í röð án þess að tapa og er liðið nú með þrettán stiga forskot á toppi deildarinnar.

Það leit reyndar út um tíma að Bayern væri að fara að tapa sínum fyrsta leik síðan í október þegar bosníski landsliðsmaðurinn Vedad Ibisevic kom Stuttgart í 1-0 á 29. mínútu.

Varamaðurinn Claudio Pizarro jafnaði metin með skalla eftir aukaspyrnu Thiago á 76. mínútu leiksins og Thiago skoraði síðan sigurmarkið sjálfur með frábæru skoti. Thiago er á sínu fyrsta tímabili með Bayern og þetta var hans fyrsta mark í þýsku úrvalsdeildinni.