Higuain tryggði Napoli sigur

Adel Taarabt skoraði í sínum fyrsta leik með AC Milan á Ítalíu en það dugði skammt í leik liðsins gegn Napoli í kvöld.

Taarabt var aðeins átta mínútur að koma AC Milan yfir en hann kom til félagsins sem lánsmaður frá QPR fyrir rúmri viku síðan.

Gökhan Inler jafnaði metin fyrir Napoli aðeins þremur mínútum eftir mark Taarabt og Gonzalo Higuain tryggði liðinu svo sigurinn með tveimur mörkum í síðari hálfleik.

Napoli er í þriðja sæti ítölsku úrvalsdeildarinnar með 47 stig, tólf stigum á eftir toppliði Juventus. AC Milan er í tíunda sætinu með 29 stig.

Fyrr í dag vann Fiorentina 2-0 sigur á Atalanta og Udinese hafði betur gegn Chievo, 3-0.