Vandinn var hjá Red Bull

Adrian Newey aðalhönnuður Red Bull liðsins í formúlu eitt viðurkennir að hann hafi vanmetið kæliþörf nýju vélarinnar.  Uppröðun vélarinnar hefur einnig áhrif og segir Newey að hann hafi pakkað hlutum Renault vélarinnar of þétt saman.

V-6 vélarnar þurfa mun meiri kælingu en forverar þeirra. Slíkt hefur áhrif á hönnun á yfirbyggingu bílsins. Loftvasar á hliðum bílanna veita meirihluta kælingarinnar. Ýmis minni loftinntök sjá svo um afganginn. Öll valda þau því að bíllinn verður ekki eins straumlínulagaður.

Ef marka má árangur Lotus á upptökudögum sem liðið stóð fyrir 7. og 8. febrúar þá er Renault vélin farin að virka vel. Renault vélarnar höfðu valdið liðum vandræðum á fyrstu æfingunum. Nú virðist aftur á móti sem að uppfærslur Renault virki vel.

Red Bull vonast til að vinna upp tapaðan æfingatíma í Barein. Adrian Newey telur að honum og hönnunarteymi hans hafi tekist að leysa vandann. Hann segist hafa prófað áhættusama uppröðun vélarinnar til að lágmarka áhrif á loftflæðið yfir bílinn.  Æfingar hefjast í Barein á morgun og þeim lýkur síðan á laugardag.