Spáir miklum framförum hjá nýrri kynslóð formúlubíla

James Allison, yfirmaður tæknideildar Ferrari, býst við miklum framförum á getu nýrrar kynslóðar formúlubíla. Margir ökumenn hafa þó sagt þessa nýju kynslóð of hægfara.

Allison heldur því fram að ekkert lið sé farið að krefja vélarnar um full afköst. Telur hann að það muni ekki gerast fyrr en nær dregur fyrstu keppni á tímabilinu.

Niðurtog vegna loftflæðis mun einnig aukast töluvert að hans mati. Jafnframt segir Allison að mörg lið hafi í raun notast við einfalda fram- og afturvængi á æfingunum í Jerez. Hugsanlega mun þróunin á þeim koma seinna í ljós, jafnvel að miklu leyti á miðju tímabili.

Jenson Button var einn þeirra ökumanna sem tjáði sig um getu bílanna. Hann taldi þá of hægfara. Button er samt sannfærður um að þegar kemur að fyrstu keppni verði öll lið farin að nálgast hraða síðustu ára.

Æfingarnar í Barein sem hefjast 19. febrúar munu gefa skýrari mynd af stöðu liðanna eftir því sem líður á. Fyrsta keppnin er þann 16. mars í Ástralíu.